Qırım - dünyanıñ en dülber, zengin köşelerinden biri olmaqnen bir arada, oñayıtlı ve geostratejik baqıştan mühim olğan bir regiondır. Qırım - iqtisadiy, harbiy ve siyasiy noqtai-nazarlardan elverişli ve stratejik yarımada olğanı kimse içün sır degildir. Keçmişke bir nazar atacaq olsaq, Qırım yarımadası sakin olmağan yani yerli ehali pek çoq cenkleşip kelgendir. Ahır-soñu, bu topraq qırım halqınıñ varlığı, baylığı, Vatanı olup qaldı. Qırım yarımadasında qırım halqı millet olaraq şekillenerek öz ulu devletini qurğandır. Asırlar devamında her bir sahada inkişaf etip kelgen Qırım Hanlığı, öz devrinde Şarqiy Avropanıñ en küçlü devletlerinden biri olup kelgendir. Merkeziy, Şarqiy Avropa ve Ğarbiy Asiyada da siyasiy ve harbiy sahalarda Qırım Hanlığı asılar devamında liderlik yapqandır. Amma ne yazıq ki, 340 yıl devamında "at oynatqandan" soñ, Qırım Hanlığıniñ hükümdarlığı soñuna ere. Neticede Vatanımız bir çoq qara yıllar devamına qomşu imperialist Rusiye Çarlığınıñ qanlı pancası tübünde iñlemege mecbur qala. Bu devirni "Qara devir" dep adlandırmaq mumkün, çünki bu devir devamında halqımız genosid, etnosid ve sürgünlükke oğratılğandır. Allağa binlerce kere şükür etmek kerekmiz ki, milletimiz duşmanlarımız istegeni kibi yer yüzünden yoq olmadı, aksine "Meclis, Millet, Vatan ve Allah" dep ayaqqa turıp milliy qurtulış yoluna çıqtı!Biz, halqımıznıñ milliy hareketinde, milliy qurtulış yoluna can ve hayatlarını feda etken ecdatlarımıznı, hiç bir vaqıt unutmayıp, hürmet ve sayğı ile añıp turamız. Biz halqımıznıñ vaziyetini añlap, milliy qurtulış hareketine ve milletimiznıñ maqsadına yetme yolunda öz qatqımıznı qoşmağa istep, milliy hareketimizge qoşılıp siyasiy sahasında çalışmağa istegimiz var.
"Bizim Qırım" adlı Halqara cemaat teşkilâtı halqımıznıñ milliy anane ve adetlerine esaslanaraq, elinde olğan butün imkânlardan faydalanıp, artıq tarihte qalğan ululığını tekrar tiklemege hareket etmekni, onıñ birligi, baht ve seadeti içün küreşmekni maqsat edingendir.
Ukraynağa bağlı olğan Ulu Vatanımızda, milliy devletçiligimizni tiklemekni maqsat dep bilemiz. Teşkilâtnıñ diger ve eñ muhim maqsatlarından biri de, kün sayın unutılmaqta olıp, ayaqastı etileyatqan ve ulu şairimiz Eşref Şemi-Zade aytqanı kibi “türkiy tiller gülzarınıñ, eñ çeçekli fidanı” olğan ana tilimizni canlandıraraq, halqımız tarafından oña nisbeten añlı sayğı ve sevgini arttırmaqtan ibaret olacaqtır. Teşkiâtımız öz faaliyetine başlar eken, Allah ve namusımız, ecdatlarımız ve kelecekteki nesillerimiz ogündeki mesuliyeti haqqında unutmayaraq, milletimizniñ yaşayışınen bağlı butün sahalarnıñ inkişaf etmesi içün daha ziyade şarait yaratmağa tırışıp, milliy menfaatlarımıznı qorçalamağa hareket etecektir.
Biz, Qırım genç ve qızları olaraq öz küç ve qudretimizni halqımız elinden zorbalıqnen çekilip alınğan haq-huquqlarnıñ qaytarılıp berilmesi ve oña nisbeten yapılğan tarihiy adaletsizlikniñ tiklenmesi oğruna feda etmege niyetlendik. Bunıñ içün, halqımıznıñ milliy ve diniy añını arttırma, ana tilini, medeniyetini ve adetlerini sevdirme ve propaganda etme, halqımızğa musbet imidj qazandırma oğrunda hep gumanizm, barışıq ve tolerantlıq prisiplerine esaslanacaqtırmız. Maqsadımızğa erişmek içün hep barışıq yolları ve usulları ile hareket etilecektir.
Haq-huquq qorçalav işinde zemaneviy usullarını qullanmaq içün, teşkilâmız “halqara” statusnı ala. Bilgenimiz kibi, halqımıznıñ büyük bir diasporası bar ve onı milletimizniñ faydası içün halqara seviyede de qullanmaqnı doğru olur edi dep hesaplaymız. Dünyada yaşağan qırımlılarnıñ imkânlarını Vatanlarına doğurtmağa tırışacaqmız.
"Bizim Qırım" adlı Halqara cemaat teşkilâtı bütün qırımtatar milleti kibi, öz kelecegine işanıp, Qırımtatar Milliy Qurultay ve Meclisini - halqımıznıñ tek yuqarı milliy organı olaraq tanıy. Biz öz faaliyetimizde Milliy Qurultay qanunlarına, Milliy Meclis emirlerine esaslanacaqmız.
Biz ant ettik, ant etkenlerniñ izlerinden ketmege,
Milletimiz haqqı içün canımıznı feda etmege...
