Kütleviy haber vastalarında tilimizniñ alı ve inkişafı
20.11.2009 19:57
Er bir halqnıñ inkişafı mevzusında farqlı baqışlar ve işbu baqışlarnen cemaatçılıqnen paylaşılması, teşviqat etilmesi tabiiy bir aldır. Amma şübesiz ki, bu belli bir tertipnen yapılmalı. Milliy Meclis ve Qırım musulmanlarınıñ diniy İdaresini tenqit etkenler daima kelişmegen şekillerni qullana. Ve yazılarını da daima ana tilimizde degil de, başqa tillerde yazalar.
Eger bu yazılarını yazğan adam ve siyasetçilerniñ niyetleri temiz olsa em de olar bu malümatnı faydalı dep tanısa, bu yazılar ana tilimizde olmalı. Akis alda olar bu malümatlarnı kimler içün yazalar? Başqaları içün yazalar degen fikirni, ne yazıq ki, çetke atıp olamaymız. Böyle ise, demek olarnıñ yahşı niyetlerine şübelenmek mümkün.
Bizim fikrimizce, milletimizniñ ayatı ile bağlı siyasiy ve başqa malümat, maqale ve resmiy vesiqalar ana tilimizde yazılmalı. Bu ise, aramızda olğan davalarnıñ öz aramızda qalmasına ve aynı zamanda tilimizniñ inkişafına, kütleviy seviyede qullanılmasına bir sebep olur.
Biz, halqımıznıñ er angi bir davasınen bağlı olğan mesele ve malümatnı qırımca (qırımtatarca) yazılması ve seslendirilmesini teklif etemiz.
BQ matbuat hızmeti
