Noman Çelebicihannıñ hatırasına bağışlanğan matem mitingi
01.03.2010 22:10
Fevral 23 künü Aqyarda Noman Çelebicihannıñ hatırasına bağışlanğan matem mitingi keçirildi. Bu mitingni Aqyar regional meclisi teşkil etti. Mitingte Qırımtatar Milliy Meclisi adından Refat Çubarov, Qırım Musulmanlarınıñ Müftisi Hacı Emir-Ali Ablayev, “Bizim Qırım” halqara cemaat teşkilâtınıñ reisi ve azaları, em de milliy areket veteranları iştirak etti. Ondan da ğayrı N. Çelebicihannıñ torunı 80 yaşını keçken Niyara Mamutova da iştirak etti. I Qurultaynı teşkil etkenlerden biri, Qırım, Ukraina, Belorusiye, Lehistan, Litvaniya musulmanlarınıñ müftisi ve Qırımtatar halqınıñ milliy areketini tiklegen Noman Çelebicihannıñ hatırasını añmaq içün 200 qadar adam toplandı. Noman Çelebicihan qurban olunğan kününden 92 yıl keçti. Qırım Musulmanlarınıñ müftisi Hacı Emir-Ali Ablayev dua oquğan soñ “Ant etkenmen” milliy gimni yañğıradı. Qırımtatar Milliy Meclisi reisiniñ birinci muavini Refat Çubarov N. Çelebicihannıñ faaliyeti qırımtatar halqınıñ tarihında pek müim olğanını hatırlattı ve şimdi halqımızğa öz Vatanında yaşaması ve ana tilinde laf etmesi aqqında tüşünmek kerek dep qayd etti. “Bizim Qırım” HCT reisi Abduraman Egiz toplağanlarğa hitaben, qırımtatar yaşları N. Çelebicihan kibi şahıslarnen daima ğururlanacaq, yani o, örnek olaraq, öz sevgisini Vatanına ve halqına bildirgeni kibi yaşlarımız da areket etecek dep qayd etti.
